“ဆရာ ရင်တွေတုန်တုန်နေတယ်ဆရာ၊ မောလည်းမောတယ်၊ လက်တွေလည်းတုန်တယ်။”
လူနာကို ကြည့်လိုက်တော့ ခပ်ပိန်ပိန်၊ မျက်လုံးလေးက နည်းနည်းပြူးချင်ချင်။ လည်ပင်းလေးက ခပ်မို့မို့။
“ပိန်သွားလာခင်ဗျ”
ဒေါက်တာကျော် ပြန်မေးကြည့်လိုက်သည်။
“ဟုတ်ဆရာ၊ ပိန်သွားတယ်။”
“အစားရော စားနိုင်လား၊ အဲ့ဒါနဲ့ သူ အခုတလော စိတ်ပိုတိုနေတတ်လားဗျ”
လူနာ့ အမျိုးသားဘက်ကို ကြည့်ပြီး မေးလိုက်ခြင်းဖြစ်သည်။
လူနာ့အမျိုးသားက ရယ်ရင်းဖြေသည်။ “ဟုတ်တယ်ဆရာ”
“အဲ့ဒါဆို လည်ပင်း Thyroid ဟော်မုန်းများတဲ့ လက္ခဏာတွေပါ၊ ဆရာလိုတာလေးစမ်းသပ်ပြီး သွေးစစ်ခိုင်းပါမယ်။ လတ်တလော သောက်ဖို့ ဆေးလည်းညွှန်လိုက်ပါမယ်။”
နောက်တစ်ကြိမ် အဖြေနှင့် လာပြတော့ Thyroid ဟော်မုန်းဓာတ်များနေသည်ဟု အဖြေထွက်သည်။
“ဆရာ ကုသမှု အကြောင်း ရှင်းပြပါမယ်။………..”
…………
“ဟုတ်ဆရာ။ ဘာတွေရှောင်ဖို့လိုမလဲ”
လူနာကပြန်မေးခြင်းဖြစ်သည်။
………………………..
Thyroid ဟော်မုန်းများသည် တစ်နည်းအားဖြင့် လည်ပင်းဂလင်း အဆိပ်များသည်ဟု အသိများသော Hyperthyroid ရောဂါရှိနေသူများတွင် ရှောင်ရှားသင့်သော အစားအစာများကို ဖော်ပြပေးလိုက်ပါသည်။
အိုင်အိုဒင်းဓာတ်သည် သာမန်သူများတွင် ကောင်းသော်လည်း Thyroid ဟော်မုန်းများသူများတွင် အိုင်အိုဒင်းဓာတ်များက ပိုဆိုးစေတတ်ပါသည်။ ထို့ကြောင့် အိုင်အိုဒင်းဓာတ်များသည် အောက်ပါအစားအစာများကို လျော့စားသင့်ပါသည်။
- အိုင်အိုဒင်းဆား
- ငါးအမျိုးမျိုး
- ခရု
- ပင်လယ်ရေမှော်
- ပုဇွန်၊ ဂဏန်း နှင့် တခြားပင်လယ်စာများ
- နို့ထွက်ပစ္စည်းများ
- ဥအနှစ်
- အိုင်အိုဒင်းဓာတ်ဖြည့်ထားသော တခြားအစားအစာများ
ထို့အပြင် ပဲပိစပ်ဖြင့်လုပ်ထားသော အစားအစာများသည် Thyroid ဟော်မုန်းများခြင်းအတွက် ဓာတ်ရောင်ခြည်ဆေးဟု လူသိများသော Radio iodine ကုသမှု ယူသည့်အချိန်တွင် ဆေး၏ ထိရောက်မှုကို အားလျော့စေသည့်အတွက် ထိုကုသမှုယူထားချိန်တွင် မစားသင့်ပါချေ။ ဥပမာ ပဲနို့၊ တို့ဟူး
ကဖင်း ခေါ် ကော်ဖီဓာတ်သည် ရင်တုန်ခြင်း၊ ကတုန်ကယင်ဖြစ်ခြင်းစသည့် Thyroid ဟော်မုန်းများခြင်းကြောင့် ဖြစ််သော လက္ခဏာများကို ပိုမို ဆိုးစေတတ်သဖြင့် ထိုလက္ခဏာများရှိနေလျှင် ကော်ဖီ၊ ချောကလက်၊ ကဖင်းဓာတ်ပါသော စွမ်းအားဖြည့် အချိုရည်များ၊ ကိုလာ စသည်တို့ကို လျှော့သောက်သင့်ပါသည်။
