နေ့စဉ်သောက် ဟော်မုန်း ၂မျိုးပါသည့် သားဆက်ခြားသန္ဓေတားဆေးကဒ်(Combined Oral Contraceptive Pills)
- အမျိုးသမီး ဟော်မုန်း (၂) မျိုးပါဝင်ပြီး တစ်နေ့တစ်လုံး နေ့စဉ်သောက်သုံးရသည့် သားဆက်ခြား ဆေးကဒ်ဖြစ်ပါသည်။
- ထိရောက်မှုရှိပြီး ဆေးရပ်လိုက်လျှင်လည်း ချက်ချင်း ကလေးပြန်ရနိုင်ပါသည်။
- COC က ရာသီစလာချိန်၏ ပထမ ၅ ရက်အတွင်း စသောက်လျှင် အကောင်းဆုံးဖြစ်သည်။ ထိုသို့သောက်လျှင် ကိုယ်ဝန်ရနိုင်ခြေကို နောက်ထပ် သားဆက်ခြားနည်းသုံးစရာမလိုဘဲ ကာကွယ်နိုင်မည်ဖြစ်သည်။
- ပြထားသော မျှား သို့မဟုတ် လက်ညှိုးပုံအတိုင်းသောက်သွားရပါမည်။
- အကယ်၍ ရာသီစလာချိန်မှ ၅ ရက်နောက်ပိုင်းတွင်မှ စသောက်လျှင် စသောက်ပြီး ၇ ရက်အတွင်း ကိုယ်ဝန်ကို အပြည့်အဝမတားဆီးနိုင်သေးသဖြင့် ထိုရက်အတွင်း အတူနေမည်ဆိုပါက တခြား သားဆက်ခြားနည်းတစ်ခုခု (ဥပမာ ကွန်ဒုံး) ကို သုံးသင့်သည်။
- ၂၈ လုံးပါသည့် ဆေးကတ်ဆိုလျှင် တစ်ကတ်ကုန်လျှင် နောက်တစ်ကတ် ချက်ချင်းစသောက်ရမည်။ ၂၁ လုံးသာပါသည့်ကတ်ဆိုလျှင် တစ်ကတ်ကုန်ပြီး ၇ ရက်နားပြီးမှ နောက်တစ်ကတ်စသောက်ပါ။
- မသုံးစွဲသင့်သည့် အခြေအနေတွေ တော့ ရှိပါသည်။ (မသုံးစွဲသင့်သည့် အခြေအနေများကို ပြန်လည်ဖတ်ရှုရန် နှိပ်ပါ။)
- ရာသီလာချိန်တွင် ဖြစ်တတ်သော ဗိုက်အောင့်ဗိုက်နာ၊ ရာသီသွေးများခြင်းနှင့် သွေးအားနည်းခြင်းတို့ကို ကာကွယ်ပေးနိုင်ပါသည်။ ဝက်ခြံလည်းပျောက်ပါသည်။
- ဆေးစသောက်ကာစတွင် ရံဖန်ရံခါ သွေးတစ်စက် တစ်စက်ဆင်းခြင်း၊ ရာသီသွေးမမှန်တာခြင်းများဖြစ်နိုင်ပါသည်။ နောက်ပိုင်းတွင် တဖြည်းဖြည်းသွေးဆင်းနှုန်း နည်းပါးပြီး လအနည်းငယ်ကြာလျှင် မှန်လာနိုင်ပါသည်။
- ဝလာခြင်း၊ ခေါင်းကိုက်ခြင်း၊ အသားဝါခြင်း၊ တင်းတိပ်ထွက်ခြင်း၊ သွေးကြောတွင်းသွေးခဲခြင်းစသည်တို့ တချို့သူများတွင် ဖြစ်တတ်ပါသည်။
သင့်တွင် တခြားရောဂါအခံတစ်ခုခုရှိခြင်း၊ ဆေးဓာတ်မတည့်ခြင်းများရှိတတ်ပါက ဆရာဝန်နှင့် တိုင်ပင်ပြီးမှ သောက်သုံးပါ။ အကယ်၍ ပုံမှန်ဆေးသောက်ရန် မေ့သွားပါက မည်သို့ ဆက်လုပ်သင့်သည်ကို ဆရာဝန်နှင့် တိုင်ပင်သင့်ပါသည်။
