အမေးများတဲ့ မေးခွန်းတစ်ခုပါ။ အမေးအဖြေလေးတွေမှာ မကြာခဏလာမေးတတ်ကြလို့ ဒီမှာ ဖြေပေးလိုက်တာပါ။
ယေဘုယျအားဖြင့် ဖြေရရင်တော့ ကလေးရဖို့ အလားအလာ နည်းတယ်လို့ ဖြေပါရစေ။ ဒါပေမယ့် အောက်ကအချက်လေးတွေကို သတိထားဖို့ လိုပါမယ်။
- မိန်းကလေးရဲ့ ရာသီစက််ဝန်းရက်ပေါ်မူတည်ပါတယ်။ တကယ်လို့ မိန်းကလေးက ရာသီစက်ဝန်းတိုတဲ့သူ ဆိုရင်တော့ ရာသီလာချိန်မှာ အကာအကွယ်မသုံးဘဲအတူနေထားရင် ကလေးရတတ်ပါသေးတယ်။
မိန်းကလေးတစ်ယောက်ရဲ့ ရာသီစက်ဝန်းက ပျမ်းမျှကတော့ ၂၈ ရက်တစ်ခါ ရာသီလာလေ့ရှိကြပါတယ်။ ၂၈ ရက် တစ်ခါ ရာသီလာတဲ့ သူမှာ ရာသီစလာတဲ့ ရက်ကနေ ၁၄ ရက်မြောက်မှာ မျိုးဥကြွေလေ့ရှိပါတယ်။ အဲ့လို မျိုးဥကြွေတဲ့ အချိန်ဝန်းကျင်မှာ ကလေးရတတ်တာပါ။ မိန်းကလေးရဲ့ ရာသီစက်ဝန်းက ပုံမှန်အားဖြင့်ကို ၂၁ ရက်ကနေ ၃၅ ရက်ကြားရှိတတ်ပါတယ်။ အမျိုးသားရဲ့ သုက်ပိုးက မိန်းကလေး ခန္ဓာကိုယ်ထဲ ၇ ရက်လောက်ထိ အသက်ရှင်နိုင်လို့ပါ။ တကယ်လို့ ဥပမာအားဖြင့် မိန်းကလေးရဲ့ ရာသီစက်ဝန်းက ၂၂ ရက်ပဲ ရှိတယ်ဆိုပါတော့။ အဲ့ဒါဆို သူ့မျိုးဥက ရာသီစလာတဲ့ ရက်ကနေ ၈ ရက်မြောက်လောက်ဆို ကြွေပါပြီ။ အဲ့ အချိန် ရာသီလာနေတုန်းက အတူနေထားတဲ့ အမျိုးသားရဲ့ သုက်ပိုးလေးတွေက ရှိနေဦးမယ်ဆို ကလေးရသွားနိုင်ပါတယ်။ - ရာသီလာတာအစစ်မဟုတ်ခဲ့ရင်
မိန်းကလေးတွေမှာ သွေးဆင်းတိုင်း ရာသီသွေးဟုတ်ချင်မှ ဟုတ်တာပါ။ ရာသီမဟုတ်ဘဲ ရာသီစက်ဝန်းကြားထဲမှာလည်း သွေးဆင်းတတ်ပါတယ်။ မျိုးဥကြွေတဲ့အချိန်မှာ သွေးနည်းနည်းဆင်းတတ်ပါတယ်။ အဲ့အချိန်ကို ရာသီလာနေချိန်လို့ထင်ပြီးတော့ အတူနေလိုက်ရင် သူနဲ့ကျမှ တိုက်တိုက်ဆိုင်ဆိုင်ဆိုသလို ကလေးရသွားနိုင်ပါတယ်။
အဲ့ဒါကြောင့် သင့်အနေနဲ့ ကလေးမလိုချင်တာဆိုရင်တော့ တခြား သန္ဓေတားတာ၊ အကာအကွယ်သုံးတာတွေ လုပ်ရင်တော့ ပိုကောင်းတယ်ဆိုပါရစေ။ ပြီးတော့ ရာသီလာချိန် အတူနေရင် လိင်ကနေ ကူးစက်တဲ့ ရောဂါတွေ ပိုကူးနိုင်တာမို့ စိတ်ချရတဲ့ ဆက်ဆံမှုမဟုတ်ရင် အကာအကွယ်ကို ပိုတောင် သုံးသင့်တယ်လို့ ဆိုပါရစေ။
ရာသီလာနေတုန်း အတူနေရင် ဘယ်လိုကောင်းကျိုး ဆိုးကျိုးတွေ ရှိနိုင်သလဲကို နောက်ပိုင်းမှာဆက်ဆွေးနွေးပေးပါမယ်။
