ဆေးကြောင့်ဖြစ်တဲ့ ဆီးချို

တခါတလေမှာ ဆီးချိုရောဂါဟာ တချို့ဆေးတွေ ကြောင့် ဖြစ်တတ်ပါတယ်။ အများအားဖြင့် ရင်ကြပ်လို့၊ အဆစ်အမြစ်တွေကိုက်ခဲလို့၊ အစားမစားနိုင်လို့ စားချင်အောင်၊ လူနေရတာ လန်းဆန်းအောင် ဆိုပြီး စပ်ဆေးတွေထဲမှာ ပါနေတဲ့ စတီးရွိုက် (Steroids) ဆေးတွေကြောင့် အဖြစ်များပါတယ်။ အဲ့ဆေးနာမည်တွေကတော့ Prednisolone, Dexamethasone, Methyprednisolone, Hydrocortisone, Triamcinolone စတဲဲ့ ဆေးတွေပါ။

တခါတလေမှာ ရောဂါအနေအထားအရ မဖြစ်မနေသုံးရသူတွေလည်း ရှိပါတယ်။ အဲ့လိုလူတွေမှာလည်း ဆီးချိုဖြစ်တတ်တာမျိုးရှိပါတယ်။
တချို့တွေကျတော့ ဆရာဝန်က အဲ့ဆေးမျိုးတွေ သောက်ခိုင်းတဲ့ အချိန်ကာလပြီးသွားပေမယ့်လည်း ဒီဆေးက ကောင်းတယ်လို့ မှတ်ထားပြီး ကိုယ့်ဘာသာ ဆက်သောက်နေမိတာမျိုးလည်း ရှိပါတယ်။ ပြီးတော့ အဲ့လိုဆေးတွေကို စပ်ဆေးဆိုင်တွေက ထည့်ပေးလေ့ရှိပါတယ်။ အဲ့ဆေးတွေရဲ့ ထူးခြားချက်က သောက်ပြီးသွားရင် မြန်မြန်သက်သာသွားတယ်။ နေလို့ ကောင်းသွားတယ်ဆိုတော့ လူနာတွေက ကြိုက်ကြတာပါ။ ဒါပေမယ့် ကြာကြာသောက်ရင် ဆီးချိုအပြင် သွေးတိုးတာ၊ အရေပြားတွေ ပါးတာ၊ အရေပြားအောက် သွေးထွက်လွယ်တာ၊ အရိုးပါးတာတွေ ဖြစ်လာတတ်ပါတယ်။ ဒါတွေ ကြောင့် ရေရှည်သောက်လို့ မကောင်းတာပါ။

အဲ့လိုဆေးတွေသောက်လို့ ဆီးချိုတွေတက်လာတာမျိုးဖြစ်ပြီဆို ကျွမ်းကျင်တဲ့ ဆရာဝန်တွေနဲ့ သေချာပြပြီး ဆေးကို ဖြည်းဖြည်းချင်းလျှော့ပြီး ဖြတ်ဖို့လိုပါတယ်။ ရုတ်တရက်ဖြတ်လိုက်ရင်လည်း သွေးပေါင်ကျတာ၊ ဆီးချိုအရမ်းကျသွားတာ၊ ရှော့ရတာတွေထိ ဖြစ်တတ်ပါသေးတယ်။

အဲ့ဒါကြောင့် ဆီးချိုဖြစ်နေတဲ့သူတွေအနေနဲ့က ကိုယ်သောက်မိတဲ့အထဲမှာ စပ်ဆေးတွေ၊ အပေါ်မှာပြောခဲ့တဲ့ ဆေးမျိုးတွေ၊ တချို့တိုင်းရင်းဆေးတွေ ရေရှည်စွဲသောက်မိတာတွေရှိရင် ဆရာဝန်ကို တိုင်ပင်ကြည့်ပြီး ဆေးကို စနစ်တကျ လျှော့ပြီး ဖြတ်သွားခြင်းဖြင့် ဆီးချိုသက်သာနိုင်ကြောင်း ပြောပြပေးပါရစေ ခင်ဗျာ။

(Dr Kyaw ရေးသားသည်။)